शहीद द्वीप/अंदमान-निकोबार (Ira’s Global Ascent) : महाराष्ट्रातील बुलढाणा येथील अवघ्या 10 वर्षीय ईरा आदित्य राऊत हिने स्कूबा डायव्हिंगच्या क्षेत्रात उल्लेखनीय कामगिरी करत एका दिवसात सहा जागतिक विक्रम नोंदवले आहेत. वयाच्या 10 व्या वर्षी, 17 तास आणि 35 मिनिटांनी जगातील सर्वात कमी वयाची पात्र स्कूबा डायव्हर बनण्याचा मान तिने मिळविल्याचा दावा करण्यात आला आहे. अंदमान-निकोबारमधील शहीद द्वीप येथील ‘डायव्ह ट्राइब सेंटर’मध्ये ईराने ही कामगिरी केली. विशेष म्हणजे, तिचे आई-वडील दोघेही भारतीय नौदलात कमांडर पदावर कार्यरत आहेत.

जगातील सर्वात कमी वयाची पात्र स्कूबा डायव्हर बनण्याचा मान

ईराच्या स्कूबा डायव्हिंग पात्रतेला ‘स्कूबा स्कूल्स इंटरनॅशनल’ने (Ira’s Global Ascent) प्रमाणित केले आहे. तसेच, ‘इंटरनॅशनल बुक ऑफ रेकॉर्ड्स’चे निर्णायक अरविंदर सिंह भाटी यांनी तिच्या सहा विक्रमांची तपासणी करून त्यांना पुष्टी दिल्याचे सांगण्यात आले आहे. इतक्या कमी वयात तिने मिळविलेल्या या यशामुळे तिचे सर्वत्र कौतुक होत आहे.

सर्वात कमी वयाची पात्र स्कूबा डायव्हर बनण्याबरोबरच ईराने पाण्याखाली विविध कौशल्ये दाखवत आणखी विक्रम नोंदवले. यापैकी (Ira’s Global Ascent) तीन विक्रम किशोरवयीन वयोगटाखालील सहभागींच्या श्रेणीत असल्याचे सांगण्यात आले आहे. ईराच्या कामगिरीमध्ये पाण्याखाली एका मिनिटात सर्वाधिक हँड सिग्नल दाखवणे, डायव्हिंग उपकरणांची ओळख पटवणे, एका मिनिटात सर्वाधिक अंतर कापणे आणि स्कूबा डायव्हिंगदरम्यान समुद्री जीवांच्या सर्वाधिक प्रजाती ओळखणे अशा कौशल्यांचा समावेश आहे. या कामगिरीतून तिने पाण्याखालील वातावरणातील आपली तयारी, निरीक्षणक्षमता आणि कौशल्य दाखवून दिले.

आपल्या यशाबद्दल आनंद व्यक्त करताना ईरा म्हणाली, “पाण्याखाली स्कूबा डायव्हिंग करणे माझ्यासाठी अतिशय रोमांचक अनुभव होता. एवढ्या कमी वयात विक्रम प्रस्थापित करू शकले, याचा मला आनंद आहे. यापुढेही मला नवीन गोष्टी शिकायच्या आहेत आणि पाण्याखालील जग अधिक जवळून पाहायचे आहे.” ईराच्या या (Ira’s Global Ascent) कामगिरीमुळे महाराष्ट्राच्या शिरपेचात मानाचा तुरा रोवला गेला आहे. कमी वयात साहसी खेळातील कौशल्य सिद्ध करणाऱ्या ईराने आपल्या जिद्दीने आणि धाडसाने अनेकांसमोर प्रेरणादायी उदाहरण ठेवले आहे.